Die gschissenen Bio-Bikes ghörn verboten!
Neulich fahr i im Turbo Modus - waast eh, 34 vorn hinten 16er - gmiatlich mit grad so viel dass er ma ned ohdraht, der Murl, also so ca. 21-23km/h aufn Berg.
Was behindert den elektrifizierten Ernsthaft-Sportler?
Na klar, zwei so auf "da schau her wie zach i bin" machende Möchtegern Profis, enge Bib Shorts und Segafredo Rennrad-Trikot, treten schwer keuchend und stinkend schwitzend mit ihren altmodischen Bio Bikes den Berg rauf.
Was werns drauf ghabt ham, 7-10km/h vielleicht, 12 km/h wenns viel is.
32 vorn und hint am 40er beinah-Umfaller Ritzel.
Na und logischerweise nebeneinander fahrend und versuchen sich zu unterhalten, also sich einzelne Silben stoßweise zuzischend.
I man, samma sich ehrlich, wennst eh scho am sterben bist, brauchst ned so tun als obst in Hulk gfressen hättst. Erst recht ned wenn mas eh scho von der weiten sicht.
I tritt also gmiatlich hintendrein, kaum dass i die Pedale unter den Schuhsohlen gspür und schau ma des Drama an.
Aber irgendwann reichts ma und i mach dem Trauerspiel a End.
"Achtung links!" schrei i, schalt aufs 14er und druck a bissl an, so auf ca. 23-24km/h.
Im vorbei fahren zünd i ma no a Marlboro an und grüß die zwa Sportskanonen freundlich: "Griass eich Buama! Na? Heut die schwarze Pisten ausgsucht?" und lass dann stehen.
Irgendwas dürft einer der beiden gsagt ham, wie a Grüssen hat sa si ned anghört, wurscht es war so oder so zweng Sauerstoff für a verständliche Aussprache vorhanden.
Aber ans is scho hab i ma denkt, zum zuschauen is sowas ned schee, fast möcht i sagen ungustiös. No dazu in der unschuldigen schönen Natur , wenns so daherschwitzen und ois anstinken.
Eigentlich san so stromlose Radln eh nur was für Einedrahrer, do schauts her was i für a Kondi hab und was i für Muskeln hab.
Na ehrlich, wen interessiertn des?
Am Schutzhaus oben, hängens auf die Bankln dann wie a Ausreibfetzen und nuckeln wie a Dreijähriger an ihre Flaschln während sa si an Riegel eineschieben der ausschaut wie aus dehydrierter Hundescheisse.
A jeder war ma no aufs Schweinsbratl mit Kraut und Knödel und a frisches Krügel neidig, an die Blicke hat mas gsehn aber zugeben tätns die Laktat-Süchtler nie.
Insgesamt touristisch und gastronomisch macht des afoch ka gutes Bild und harmonisch is sowieso anders, drum ghörn ie gschissenen Bio Bikes verboten.